Bengkala si mbiring gurung

"Belanda si Mbiring Gurung"

Ibas kuan kuan kalak karo megati sibegi "Bengkala Si Mbiring Gurung" antusenna emekap, kalak si paling bandel ibas komunitasna. Payo kin ibas komunitas "bengkala" cukup mbue erbagena, misalna lit Imbo, lit ka Sarudung, Mawas, Kera, Kulikap, kerina tempasna menam menam seri, janah tergolong kalak kerangen alias "orang utan".

Sea katan Bengkala si Mbiring Gurung, lit ka sada jenis nari emekap Bengkala Tonggal. Adi rombongen bengkala berkat ku sada ingan i tengah kerangen biasana arah lebe lit bengkala perkakap eme si tugasna jadi pengintai tah mawen lit kari perburu tah pe rubia rubia si merawa si  mengancam rombongen. Emaka rombongen bengkala si enterem. Jenari i ikuti piga piga bengkala si tergalangen sebagai pengawal. Arah pudi kal emaka lit bengkala si lebih galangna, la tempa ikut ia bas rombongen, tapi bengkala si perpudi enda me situhuna puanglima rombongen si biasa i gelari bengkala tonggal. I gelari bengkala tonggal sebab ia pang erdalan sisada la ibas rombongen.

Bage gia ibas turi-turin sekali enda la sicakapken terdauhen kerna Bengkala Tonggal bagepe Bengkala si Mbiring Gurung. Tapi si cakapken kerna Bengkala si Mbiring Takal. Gelah enggo tangkas, bengkala si mbiring takal emekap jelma manusia. I kataken bengkala si mbiring takal erkiteken perasadna bagi perasad bengkala, aminna pe ia jelma manusia. Megati adi sekalak danak danak seh kal gutulna i sumpamaken kalak ia, bagi Bengkala si mbiring takal. Ertina tempasna tempas jelma, tapi perasadna perasad bengkala. Mbiring tuhu bukna bagi jelma si deban, tapi nggandili rusur pengkebetna. Adi la nggege, tah encedai. Megati pe megasgas janah nggit ka nangko janah ngerampuk, des kal bagi bengkala nangko jaung tah buah kayu sideban, erbahan segat ate perjuma ras jelma si enterem.

Ibas paksa gundari enda ijah ije reh buena bengkala si mbiring takal. Ibas  cakap melayuna i gelari "preman". Preman enda biakna "man pit, erdahin la nggit". Preman enda pe mbue ka erbagena bagi bengkala ndube. Lit preman simpang empat, lit preman "PS" tahpe pemuda setempat. Lit preman bongkar-muat. Gelarna saja ngenca ia tempa erdahin bongkar muat, tapi kalak ndahikenca ia ngaloken ulih latih kalak sideban. Lit ka preman "ormas pemuda" raspe si ngaku "karang taruna" tapi dahinna ngutip cuke liar. Adi la galari nggege, adi peasi-asi ndedeh atena. Enggo kenca dat sen mis ia minem minem seh mabuk mbulen.

Nembeh gia ateta preman  bengkala si mbiring takal enda ndai, lit kang kalak si rate ngena. Ise ka nge ndia tumara kalak si rate ngena adi lat lat kal nge preman enda? Preman bengkala si mbiring takal enda biasana kalak si mekisat sekolah, mekisat erdahin, janah la megiken pedah urang tua, emaka asamna merawa ngenca janah la meteh mela. Jadi i pake kalak rawana ras la meteh melana. Jadiken kalak bagi biang perburu, nembut-nembuti jelma sideban, gelah kemer akap kalak.

Ibas paksa siadi, asum kita langa sekolah, reh kalak Belanda erjuma mbako i taneh Sunggal ras Patumbak deher kuta Medan. Babana si ngemona Jawa nari. Reh dekahna reh belangna buatna taneh pebelang jumana.  Piah nduru me kalak Karo ku deleng deleng. Endam si kataken nini-nininta nai "asak asak tuan kebun". Dungna enggo keri taneh kendit buat Belanda. Kita terpaksa erjuma bas rebe reben janah bas baluren. Nuan page kita bas baluren, bas reben si suan jaung tah gadung.

Belanda reh bayakna. Asil Kebun babana gelah idayaken ku Eropah. Reh dekahna reh belangna kebunna. Kenca mbako suanna ka Karet, Kopi, Teh, Coklat, Kelapa Sawit. Kerina asil kebunna la terpan kita, sebab Belanda la nggit nuan page tah nuan jaung. Dungna ngelawan me Kalak Karo. Enterem kalak ikut pergeraken. Pejuang pejuang ngelatih anak perana ras singuda nguda gelah ikut berjuang.  Kita usir Penjajah Belanda nina. Emaka kerina rayat si rulo ernembeh ate man Belanda. Belanda Penjajah, pengisap darah nina pejuang pejuang ta.

Tahun 1945 reh me masa Merdeka. Perang Dunia jadi kite kite kita merdeka, sebab talu Jepan ban Sekutu. Jem pemimimpinta Bapa rayat sirulo erbulat ukur empertahanken daulat bangsanta, pulah ibas penjajahen nari.

Kenca lebih enempuluh tahun kita merdeka, enterem denga kal senina ras turangta langa ngenanami nanam merdeka. La sekolah, la erdahin, la ka lit juma tah sabah, la lit pencarin. Emaka lit ka urang tuanta ngerana nina, "Reh pagitna ngenca merdeka enda. Sikapen dengan jaman normal mbarenda"
Megi ranan bagenda tentu mamang ateta. Kuga maka sikapen akapna masa penjajahen, sikatakenna jaman normal? Adi si sungken  terdauhen kuga maka bage? Bagenda nina jababna: "Adi Belanda nai berena denga nge kita erjuma taneh jaluren" nina. "Adi nggitlah sekolah labo nggalar. Buku pe labo nukur. Berekenna ka gerip ras batu tulis man paken asum erlajar nulis. Adi enggo kelas dua dat buku ras tinta"

Em maka sikapen akapna sope merdeka asangken gundari. Sebab gundari nekolahken anakpe terpaksa korupsi, nangko. Adi la nangko labo bias pencarin. Ija nge dage salah bena na?

Gundari enda gelarna ngenca kita enggo merdeka. Pemerintahta lebih kejam asangken Penjajah Belanda. Nai nggalar Belasteng pe labo mberatsa. Adi gundari asal muit terpaksa pedarat duit. Tah Pajak si kai deba gelarna. Ndedah kena pajak. Man tah minem kena pajak, Juma ras Reba kena Pajak, Rumah tah Lipo kena pajak, Ngalo  tading tadingen pe kena pajak. Mentas kena pajak, ngadi ngadi tah parkir pe kena retribusi nina ka. Piah dungna erkesah pe nggalar.

Kuga kin maka bage? Gundari enda pemerentah seringkang ras gubernemen nai. Adi nai pemerentah Belanda la enteremsa. Gundari Pemerentahta seh teremna. Man minem janah ngeroyal ia kerina tiap wari. Lit ka sibuk erban ende enden anah ergitar. Lit ka mehuli kal rananna tapi arah pudi kita nge ukurkenna. Emaka mesui gia jajah Belanda, suin dengan ijajah bangsa sendiri. Sebab penjajah bangsa sendiri enda serikal ras Belanda si mbiring gurung. Pinangko janah la meteh mela. Bage gia ningku ola kam merawa, o Bengkila si....oh Bengkala.

Jakarta, 20 May 2013,  Kebangkitan Nasional si mbiring takal.

Robinson Sitepu.